ქეა კავკასია (CARE Caucasus) იზიარებს სამოქალაქო საზოგადოების სხვა წარმომადგენლების მიერ გამოთქმულ წუხილს უცხოური გავლენის გამჭვირვალობის შესახებ კანონპროექტთან დაკავშირებით, რომელიც მეტწილად იმეორებს, გასულ წელს, პარლამენტში ინიცირებულ კანონპროექტს. ვემხრობით  მოსაზრებას, რომ კანონპროექტი საფრთხეს უქმნის სამოქალაქო საზოგადოებას, ადამიანის უფლებების დაცვის სტანდარტს, დემოკრატიას და საქართველოს ევროპულ და ევრო-ატლანტიკურ მისწრაფებებს. როგორც აღინიშნა, კანონპროექტმა შესაძლოა უარყოფითი გავლენა მოახდინოს საქართველოს ევროკავშირში გაწევრიანების გეგმებსა და ევროატლანტიკურ მისწრაფებებზე და შეუთავსებელია ევროპულ ნორმებსა და ღირებულებებთან. ქეა კავკასია მიიჩნევს, რომ მნიშვნელოვანია საქართველომ გააგრძელოს ევროკავშირისკენ სვლა, რამდენადაც ეს იქონიებს გავლენას თითოეული მოქალაქის უფლებრივ მდგომარეობაზე, რესურსებსა და შესაძლებლობებზე წვდომაზე.

გასული 30 წლის განმავლობაში „ქეამ” (CARE) და სხვა საერთაშორისო და ადგილობრივმა ორგანიზაციებმა უდიდესი წვლილი შეიტანეს საქართველოს ეკონომიკურ და სოციალურ განვითარებაში. ქეამ უპასუხა ყველა ჰუმანიტარულ კრიზისს, რომელიც რომელიც დამოუკიდებლობის მიღებიდან დღემდე საქართველოში განვითარებულ შეიარაღებულ კონფლიქტების ან ბუნებრივი კატასტროფების შედეგად იყო გამოწვეული ქეას სურს გააგრძელოს მთავრობასთან, კერძო და სამოქალაქო სექტორთან, მედიასთან თანამშრომლობა და პროგრამების განხორციელება, რომლებიც ადამიანების ცხოვრების ხარისხს აუმჯობესებს. ამ პირობებში, გვინდა აღვნიშნოთ, რომ კანონპროექტმა     შეიძლება     შეაფერხოს განვითარებაზე ორიენტირებული და ჰუმანიტარული დახმარების პროგრამები შემდეგი გარემოებების გამო:

1.     გამოითქვა ლეგიტიმური წუხილი, რომ კანონპროექტი ეწინააღმდეგება ადამიანის ძირითად უფლებებს, განსაკუთრებით გამოხატვისა და შეკრების თავისუფლებას და საზოგადოებრივ საქმიანობაში მონაწილეობის უფლებას. ჩვენი აზრით, დონორების მიერ დაფინანსებული ჰუმანიტარული დახმარების და განვითარების პროგრამების საბოლოო მიზანი სწორედ ადამიანის უფლებების რეალიზებაა და ამ უფლებების შეზღუდვა გავლენას იქონიებს ყველა მოქალაქის ღირსებასა და კეთილდღეობაზე.

2.     საქართველოს მთავრობა, კერძო სექტორი, სამოქალაქო საზოგადოება და მედია იღებს მნიშვნელოვან დახმარებას საერთაშორისო დონორებისგან, ფინანსური ინსტიტუტებისა და პარტნიორებისგან. ამიტომ, უნდა გავითვალისწინოთ საქართველოს პარტნიორების მიერ გაკეთებული განცხადებები და შეშფოთება ინიცირებულ კანონპროექტთან დაკავშირებით. ტექნიკური და ფინანსური დახმარების შესაძლო ცვლილება სერიოზულ გავლენას მოახდენს ქვეყნის განვითარებაზე, სამოქალაქო საზოგადოებისა და ქვეყანაში თავისუფალი მედიის ფუნქციონირებაზე.

3.     კანონის ამოქმედების შემთხვევაში, სავარაუდოდ შემცირდება საქართველოსთვის ხელმისაწვდომი დაფინანსება უცხოური დახმარების მიმწოდებლების მხრიდან. ტექნიკური და ფინანსური დახმარების შემცირება სამოქალაქო საზოგადოებისთვის ასევე დიდ გავლენას მოახდენს ზოგადად განვითარების პროგრამებსა და სოციალურ სერვისებზე, რომლებსაც ეს ორგანიზაციები ახორციელებენ. ესასევე ზიანს მოუტანს ეკონომიკის სხვადასხვა სექტორს. საბოლოო ჯამში, კანონპროექტის ეკონომიკური შედეგები ქვეყნის ყველაზე ღარიბ და მოწყვლად მოქალაქეებს დააზარალებს.

4.     დასავლელი პარტნიორების მხარდაჭერის შემცირება ასევე დააკნინებს საქართველოს და ქართული სამოქალაქო საზოგადოების, როგორც ნეიტრალური აქტორის და მედიატორის როლს სამხრეთ კავკასიაში კონფლიქტების გადაწყვეტისა და მშვიდობის მშენებლობის პროცესში. ეს საბოლოოდ აისახება საქართველოსა და რეგიონის სტაბილურობაზე და ხალხის კეთილდღეობაზე.

5.     ხელახლა ინიცირებულმა კანონპროექტმა  შესაძლოა ხელი შეუშალოს სამოქალაქო საზოგადოების პარტნიორობას მთავრობასთან. საერთაშორისო და ადგილობრივ ორგანიზაციებს, მათ შორის „ქეა კავკასიას”, აქვთ სახელმწიფოსთან მუშაობის წარმატებული გამოცდილება განვითარების და ჰუმანიტარული პროგრამების განხორციელების პროცესში. კანონპროექტმა შესაძლებელია წარმოშვას წინააღმდეგობა ამ ორგანიზაციებსა და მთავრობას შორის და  რისკის ქვეშ დააყენოს პარტნიორობა.